Лондоннинг “Тоттенҳэм” ва “Куинз Парк Рейнжерс” жамоаларининг собиқ бош мураббийи Ҳарри Реднапп автомобили рулига ўтирганча, ўз хотинини тасодиф туфайли асфальтда судради. Бу ҳақда The Sun таблоиди хабар берган.

Воқеа Англиянинг Борнмут шаҳрида юз берган. Мураббийнинг рафиқаси бўлмиш Сандранинг пальтоси салондан тушаверишда орқа эшикка қисилиб қолган. Буни пайқамаган Реднапп машинани ҳаракатлантирган. Хотинининг чинқириғидан сўнг, тўхтаган. Бу вақтга келиб аёл оёғидан оғир жароҳат олган эди.

“Асфальт қонга беланган эди, Ҳаррининг ўзи эса тошдек қотиб қолганди”, — деб гапириб берган гувоҳлардан бири. Унинг айтишича, воқеа тасодиф туфайли рўй берган.

Маълумот учун, Реднапп “Вэст Ҳэм Юнайтед”, “Портсмут”, “Тоттенҳэм” ва КПР сингари жамоаларда ишлаган. 2016 йилнинг мартида Реднапп Иордания терма жамоасини иккита ўйинга олиб тушган. Улардан бирида Бангладеш 8:0 ҳисобида мағлуб этилган, Австарилиядан эса 1:5 ҳисобида мағлубиятга учралган.