Россия мудофаа вазирлиги бельгиялик ҳамкасбларига Бельгия ҳарбий-ҳаво кучларига қарашли иккита F-16 қирувчи самолёти Суриянинг Ҳассажак шаҳрига зарбалар бергани ҳақида батафсил маълумотларни топширади. 20 октябрда "Интерфакс" маълум қилганидек, бундай баёнотни Россия мудофаа вазирлиги расмий вакили Игорь Конашенков берган.

"Сурия осмонидаги операция ҳақидаги батафсил маълумот ҳарбий ва дипломатик каналлар орқали Бельгия томонига етказилади", деб айтди Конашенков.

Конашенковнинг айтишича, ушбу самолётлар 18 октябрда Москва вақти билан соат 01:34да Иорданиядаги Ас-Салтий аэродромидан ҳавога кўтарилган ва АҚШнинг КС-135 ёқилғи қуювчи самолёти томондан икки марта ёқилғи билан тўлдирилган. 

"Ҳар бир учувчи қурилманинг унинг турини аниқлашга имкон берувчи бир нечта ўзига хос аломати бўлади. Бу самолётлар аввалроқ Россия ва Сурия радиолокацион воситаларининг аниқлаш ҳудудига бир неча маротаба учиб кирган", деб таъкидлаб ўтди Конашенков.

Конашенковнинг фикрича, Бельгия мудофаа вазири Стивен Вандепут қироллик самолётлари Ҳассажакка зарба бермаганини айтиб, жаҳон ҳамжамиятини атайлаб янглиштирмоқда. Россия вакилининг айтишича, Вандепутнинг қўл остидагилар америкалик ҳамкасблари билан бирга Бельгия Қироллиги раҳбариятини ҳам алдамоқда.

Россия мудофаа вазирлиги 18 октябрда Ҳалаб вилоятидаги Ҳассажак қишлоғига ҳаво ҳужуми берилгани ҳақида маълумот келиб тушганини маълум қилган. Ҳужум оқибатида иккита уй вайрон бўлган, 6 киши ҳалок бўлган, 4 киши яраланган. Россия ҳарбийлари бу ҳудудда зарба берилган вақтда на Россия ҳарбий самолётлари, на Сурия ҳарбий самолётлари бўлмаганини таъкидлаб ўтишган. Бу орада шу ҳудудда Бельгия самолётлари пайқалган.

Бельгия мудофаа вазири бу айбловларни рад этган. Москва бунга жавобан таркибига Бельгия кирувчи халқаро коалицияни мунтазам равишда тинч аҳолига зарба бериб келишда айблади.