Россия ташқи ишлар вазирлигининг инсон ҳуқуқлари, демократия ва қонун устуворлиги масалалари бўйича вакили Константин Долгов АҚШнинг Кубадаги Гуантанамо турмасида сақланувчи маҳбуслар сонининг қисқартирилиши "қуллар сотиладиган бозор"ни эслатади деб айтди. Бу ҳақда РИА “Новости” ахборот агентлиги хабар бермоқда

"У ерда маҳбуслар камайди, бироқ келинг улар қаерга ғойиб бўлганларини бир тафтиш қилиб кўрайлик. Бу маҳбуслар кейинчалик улар билан нима бўлиши ҳақида заррача ҳам ўйланмай бутун дунё бўйлаб тарқатилмоқдалар ва бу ҳолат қуллар сотиладиган одам бозорига ўхшайди", деб айтди Долгов.

Долговнинг айтишича, турмани ёпишга уринишлар муваффақиятсиз бўлмоқда.

"Гуантанамони ёпиш ва АҚШ махсус хизматлари Ироқ ва Гуантанамода қўллаган қийноқларни тафтиш қилишга барча уринишлар муваффақиятсизлик билан якунланди. Ҳеч ким жазоланмаган ва ҳеч нарса тергов қилинмаган. Бирор одам жавобгарликка тортилмади, Гуантанамо эса қандай бўлган бўлса, шундай қолмоқда", деб таъкидлаб ўтди Долгов.

Аввалроқ АҚШ президенти Барак Обама террорчиликда гумон қилинганлар сақланадиган Кубадаги Гуантанамо ҳарбий турмасини ҳали ҳам ёпиш истагидалиги маълум қилинганди.