Туркияда мухолиф имом Фатҳулла Гуленнинг қариндошлари – Ҳусайн Гулен ва Бушра Гулен "Фатҳуллачилар террорчилик ташкилоти" (ФЕТО) фаолиятига алоқадорликда гумон қилиниб Измирда ҳибсга олинди.

Hürriyet газетасининг маълум қилишича, Гулен жиянлари шунингдек барча узатилувчи маълумотларни шифрловчи Bylock дастурини ишлатишда гумон қилинмоқдалар. Турк разведкасининг фикрича, бу дастурдан Туркияда 16 июлга ўтар кечаси содир этилган давлат тўнтарувига уриниш иштирокчилари фойдаланганлар.

Аввалроқ Туркияда Гуленнинг укаси Қутбиддин Гулен, унинг жиянлари Амина, Камол Гулен, Адбуллоҳ Қоружук ва Муҳаммад Саид Гулен ҳибсга олинганди.

Июль охирида ФЕТОга қарши чоралар доирасида бу ташкилот билан боғланган бир неча минг ташкилот ёпилганди. 82 минг кишига нисбатан тергов ҳаракатлари амалга оширилган, 35 мингга яқин киши ҳибсга олинган.