Ўзбекистонда жорий йил ноябридан бошлаб «Уй хўжаликларининг иқтисодий ҳолати» мавзусида тадқиқот олиб борилади. У аҳолининг турмуш даражаси, шунингдек,  саломатлигига оид тўлиқ маълумотларни акс эттириши керак, деб ёзмоқда Uzbekistan Today нашри. 

Мамлакатда илк бора, «Саломатлик-3» лойиҳаси доирасида аҳолининг тиббий хизматларга сарфлайдиган харажати ва уларнинг кўпроқ фойдаланадиган тиббий хизматлар рўйхатини тузиб чиқиш мақсадида, шундай тадқиқот ўтказилади. Бу соғлиқни сақлаш соҳасини янада ривожлантиришга доир чораларни қабул қилишда ёрдам беради. 

У маҳаллаларда Жаҳон соғлиқни сақлаш ташкилоти тавсияси асосида тузилган сўровномани тўлдириш орқали амалга оширилади. Тадқиқот давомида тиббий хизматларнинг масофа жиҳатидан яқинлиги, оиланинг кўпроқ қайси тиббий хизмат (қишлоқ врачлик пунктлари, шифохоналар, давлат ёки хусусий тиббиёт муассасалари)дан фойдаланишига ойдинлик киритилади. 

Саволларга жавоб берувчилар, шунингдек, оила аъзолари сўнгги вақтларда неча марта шифокор кўригига боргани ёхуд шифохонада даволанганини маълум қилишлари керак бўлади. Бундан ташқари, улар тиббий хизматлар учун норасмий харажатлар билан ҳисоблаганда қанча маблағ сарфлашига оид бандни тўлдиришади. 

Тадқиқотлар натижаси соғлиқни сақлаш соҳасидаги муаммоларни аниқлаш ва тиббий хизмат сифатини ошириш, бирмунча кенг тарқалган касаллик турларининг профилактикаси ва даволашни яхшиаш бўйича қарор қабул қилиш имконини беради.