Америкадаги The Daily Dot янгиликлар портали муҳаррири Майлз Кли автомобилини нотўғри жойлаштиргани учун ёзилган жаримани краудфандинг ёрдамида тўлади. Бу ҳақда журналист The Daily Dot учун ёзган мақоласида хабар қилди. 

Клининг сўзларига кўра, унга автомобили билан кўчани тозалаш машинасининг йўлини тўсиб қўйгани учун 73 долларлик жарима ёзилган. Журналист жаримани зудлик билан тўлашнинг ўрнига краудфандинг хизматида тажриба ўтказишга қарор қилган. 

«Мен албатта, жаримани ўз вақтида тўлашим ҳам мумкин эди. Бундан ташқари, албатта, мен машинамни тунда қолдиришдан аввал, йўл белгиларини кўриб чиқишим ҳам керак эди. Бироқ, ноутбукли Y авлоди вакили сифатида GoFundMe кампаниясини бошлаб, воқеани тасвирладим», — дейди Кли.

Журналист эълонда қоидабузарлигини тан олган, аммо жаримани тўлаш ниятида эмаслигини айтган. Чунки, бунинг ўрнига товуқли наггетсларни харид қилишни маъқул кўрган. «Агар мени ёмон кўрадиган ҳар бир киши ҳеч бўлмаганда бир доллардан юборганда, мен камида 16 долларга эга бўлардим», — деб қайд этган журналист. 

Кли кампаниясининг тўрт куни мобайнида жаримага етарли маблағни ортиқчаси билан тўплаган. Унда 107 доллар йиғилган. 

Журналист жаримани тўлаб, Twitter саҳифасига ўз селфисини жойлаган ва ҳомийларига ташаккур билдирган.