Жаҳоннинг собиқ биринчи рақамли ракеткаси, россиялик теннисчи Марат Сафин «Краснодар» футболчиси Федор Смолов ва «Зенит» ҳужумчиси Александр Кокоринни кескин танқид қилди. Бу ҳақда Eurosport хабар тарқатди.

«Смолов ва Кокорин — майдоннинг фақат бир томонида, ўз жамоаси ўйнаётган томонда югурадиган футболчилардир. Авваллари бутун ўйин давомида бирдек ҳаракатлана олган бу футболчилар энди 15-20 дақиқада югура олмай қолишмоқда. Шунчаки уларнинг оёқлари югургиси келмайди. Буни нима билан изоҳлаш мумкин? Жисмоний тайёргарликнинг уқувсизлик билан ўтказилгани. Улар ўлик футболчилар. Уларни ҳеч оқлаб бўлмайди, улар футбол ўйнай олишмаяпти», — деган собиқ теннисчи.

Икки футболчи ҳам Россия терма жамоаси сафида ёзда Франция майдонларидан ўтказилган Европа чемпионатига боришганди. Кокорин ва Смолов турнирнинг гуруҳ босқичидаги 3та ўйинда иштирок этди. Бу футболчилар барча ўйинларда бошланғич таркибда ҳаракатлансада гол ёки голли пас муаллифи бўлишмаган. Россия терма жамоаси 3 ўйинда фақат 1 очко олди ва плей-офф босқичига чиқа олмади.

Жорий мавсумда Кокорин «Зенит» билан барча турнирлар доирасида 15 учрашув ўтказди ва 5та гол уриб, 3та голга ассистентлик қилди. Смолов эса «Краснодар» таркибида ўтказилган 12 учрашувда 11 гол уриб, битта голга пас берган.