39 ёшли россиялик боксчи Александр Устинов жорий йил декабрида украиналик собиқ жаҳон чемпиони Владимир Кличко билан жанг ўтказиши мумкин. Айни вақтда Кличко жамоаси 10 декабрда бўлиши керак бўлган жанг учун рақиб қидирмоқда. 

Дастлаб Кличко британиялик Тайсон Фьюри билан реванш жанг ўтказиши керак эди. Бироқ бу жанг Фьюрининг тайёр эмаслиги сабабли йўққа чиққан. Шундан кейин Кличкога қарши Фьюрининг ўрнига Энтони Жошуа жанг қилиши ҳақида хабар пайдо бўлган. Бироқ кейин бу жанг ҳам бўлмаслиги ҳақида хабар қилинган. Энди эса boxingscene.com маълумотларига кўра, австралиялик Лукас Браун билан музокаралар кетмоқда. Шу билан бир вақтда россиялик боксчи номзоди ҳам қаралмоқда. Устинов WBA рейтингида Кличкодан кейин 3-ўринда турибди.

Кузда Устинов кубалик Луис Ортисга қарши жанг ўтказишни режалаштирганди, бироқ жанг бўлмаган. Устинов айни вақтда 34 та жангдан 33 та ғалабага эришган ва битта мағлубиятга учраган. Кличко эса 68 та жангдан 64 тасида ғолиб бўлган, 4 тасида эса мағлубият нашидасини тортган.