Facebook direktori Kris Koks WSJDLive anjumanida kompaniya oddiy videodan real vaqtda san'at asarini yaratishga imkon beruvchi xizmatni rivojlantirishga qiziqish bildirayotganini ma'lum qildi. Yangi mahsulot Prisma’ga o‘xshash neyrotarmoqlar texnologiyasidan foydalanadi. Bu haqda Engadget ma'lum qildi.
Koksning fikricha, bir necha yildan keyin internet-trafikning 70 foizi videoga to‘g‘ri keladi. Shu sababli Facebook ijod uchun uskuna yaratish ustida ishlamoqda.
Koksning aytishicha, yangi xizmat rossiyalik dasturchilar tomonidan yaratilgan Prisma’ni eslatib yuboradi. Biroq bu dasturdan farqli o‘laroq, yangi dasturga foto yoki videoni ishlash uchun vaqt talab qilinmaydi, barchasi real vaqt rejimida sodir bo‘ladi.
Anjumanda jurnalistlarga mahsulotning demo-versiyasi namoyish qilindi. Ayni vaqtda Facebook Live Videos deb nomlangan bu xizmat sinovining boshlang‘ich bosqichida turibdi, uning ishga tushirilishi aniq sanasi noma'lum.
