Италиянинг марказий ҳудудларида бир сутка давомидаги учинчи ер силкиниши қайд этилди, деб хабар қилмоқда RaiNews24 телеканали. Бу ҳақда, Италия фуқаролик мудофааси хизмати раҳбари Фабрицио Курчо маълум қилган. 

Қайд этилишича, 4,6 баллик учинчи зилзила аввалги иккита кучли ер силкиниши рўй берган ҳудудда содир бўлган. 

Курчонинг таъкидлашича, вазият у даражада қалтис эмас. Унинг сўзларига кўра, табиий офат натижасида ҳалок бўлганлар ёки жиддий жароҳатланганлар йўқ. Бироқ, айрим кишилар тиббий ёрдам сўраб мурожаат қилишган. 

Бундан аввал, Италиянинг марказий ҳудудларининг Рим шаҳрига яқин ерларида 5,5 баллик зилзила рўй берган эди. Шундан сўнг, кўп ўтмай Перужа шаҳридан 68 км узоқликда 6,0 баллик ер силкиниши юз берган.