Samsung Electronics компаниясининг 2016 йил 3-чоракдаги операцион даромади ўтган йилнинг шу даврига нисбатан 30 фоизга тушиб кетди ва 5,2 трлн вонни (4,6 млрд доллар) ташкил қилди, деб айтилмоқда компания хабарида. Даромад Galaxy Note 7 смартфонлари ёниб кетиши билан боғлиқ воқеалар сабабли тушиб кетган. 

Samsung 3-чоракда 7,02 млрд доллар фойда олишни кутган, бироқ бу прогнозни Galaxy Note 7 смартфонлари ортга чақиртириб олиниши сабабли қайта кўриб чиққан. Оқибатда компания охирги икки йил ичида энг паст даромадни олган, деб хабар бермоқда Reuters ахборот агентлиги.  

Компаниянинг мобиль қурилмалар ишлаб чиқариш билан шуғуллануви бўлими 88,2 млн доллар операцион даромад олган, бу 2008 йил 4-чорагидан бери энг паст кўрсаткичдир.

Samsung’нинг 3-чоракдаги тушуми 7,5 фоизга қисқарган ва 43 млрд долларни ташкил қилган. Мобиль бўлим даромади эса 15,3 фоизга пасайган ва 20,3 млрд долларни ташкил қилган. 

Компания 4-чоракда операцион кўрсаткичларни яхшилашга умид қилмоқда. Хусусан, компания мобиль бўлим даромади Galaxy S7 ва арзон  моделдаги смартфонлар сотилиши ҳисобига 2015 йилнинг 4-чораги даражасида сақланиб қолишига умид қилмоқда.