Ўзбекистондаги мактаб, лицей ва коллежлар ошхоналаридан кучли газланган ичимликлар ва тезпишар таомлар йўқолади. Бунинг ўрнига махсус ташкил этилган комбинатда тушлик овқатлари тайёрланади ва таълим масканларига етказилади. Таомлар мутахассислар ва Ўзбекистон ошпазлари уюшмаси томонидан тавсия этилган махсус кўрсатмалар асосида тайёрланади, деб ёзмоқда Uzbekistan today нашри. 

Вазирлар Маҳкамасининг 2016 йил 2 майдаги 132-сонли «Ўрта ва ўрта-махсус, касб-ҳунар таълим муассасаларида соғлом овқатланишни ташкил этишни такомиллаштириш чора-тадбирлари тўғрисида»ги қарорига мувофиқ, 2020 йилгача мактаблар, коллеж ва лицейларда овқатланиш тизими такомиллашади. 

2017-2020 йилларда республиканинг узоқ ҳудудларидаги ошхонаси бўлмаган 400дан ортиқ умумтаълим масканларида буфетлар услубидаги ошхоналар барпо этилади. Бундан ташқари, ишламаётган ошхоналар қайта жиҳозлантирилиб, фаолияти йўлга қўйилади. 

2017 йилда ҳар бир вилоятда таом тайёрловчи комбинатлар ишга туширилса, 2018 йилда ҳар бир туманда шундай муассасалар пайдо бўлади. Барча таомлар махсус термо-идишларда ташилади. 

Болалар боғчаларига борувчи болалар, мактаб, коллеж ва лицей ўқувчилари учун уларнинг ёши ва эҳтиёжи эътиборга олинган махсус таомнома-дастурлар қабул қилинади. Уларга салат, биринчи ва иккинчи таом, десерт киритилади. Бу тўпламдаги тушлик нархи ўртача 2000 сўм атрофида бўлади. Бунга, таом сифатининг пасайиши эмас, балки маҳсулотни ишлаб чиқариш самарадорлигини ошириш эвазига эришилади.