Истанбул суди тўрт йиллик тортишувларидан кейин ниҳоят “Sultanahmet köfte”нинг ҳақиқий ишлаб чиқарувчиси қайси бренд эканлигини аниқлади. Бу ҳақида Daily News хабар берди. 

“Sultanahmet köfte” – шаҳарга келувчи сайёҳларнинг севимли таоми. 

Бир қатор дўконларга эга “Sultanahmet Gıda Sanayi” озиқ-овқат компанияси “Sultanahmet Köftecisi” эгаси ҳисобланган “Elit Gıda” компаниясига компенсация тўлашига тўғри келади. 

Суд Elit Gıda’нинг 1920 йилда Меҳмет Сирожиддин Тезчакин бобо томонидан яратилган “Sultanahmet Köftecisi” таомнинг ҳақиқий муаллифи ҳисобланишини аниқлади. Шунингдек суд Тезчакинлар оиласига тегишли “Sultanahmet Köftecisi” брендини “ҳақоратловчи” барча маҳсулотлар, сотувлар, ҳужжатлар, ёзувлар, реклама эълонлари ва банерлар тақиқланиши кераклигини таъкидлади. 

Шундай қилиб, суд қарорига кўра, айбланувчи томоннинг "sultanahmetkofteci.com.tr" сайти бундан буён йўқ қилинади, Меҳмет Сирожиддиннинг невараларига эса 626,993 турк лираси миқдоридаги товон пули тўланади. 

Кўп йиллардан бери брендни ниқоб қилиб олган озиқ-овқат компаниялари билан тортишувчи Elit Gıda 4 йил аввал Интеллектуал ва саноат мулк ҳуқуқлари судига бу борада шикоят аризаси билан мурожаат қилганди. 

Унга кўра, компания 1920 йилда ташкил топган ва “Sultanahmet Köftecisi” номига ўтишдан аввал у “Sultanahmet Meşhur Halk Köftecisi" номи билан юритилган. Тезчакинлар 2000 йилда “1920 Sultanahmet Meşhur Halk Köftecisi" брендига патент олган. 

2011 йилда мазкур бренд Мустафо Мерт ва Исмоил Темур Тезчакинларга тегишли Elit Gıda компанияси тасарруфига ўтади. Бренд ресторанларига кўплаб машҳур инсонлар жалб этилган, шунингдек у  сайёҳлик қўлланмаларига киритилган. Бундан ташқари мазкур бренд хорижда ҳам рўйхатдан ўтказилган.