Apple яна ўз маркетинг стратегиясини ўзгартириш ниятида. 2017 йилда компания ўз смартфоннинг иккита моделини эмас, балки учта — турли ўлчамларда чиқаришни режа қилган. Бу ҳақда компания етказиб бериш хизмати ходимларининг маълумотига таяниб, Nikkei хабар қилмоқда.

Манбага кўра, iPhone 8 учта шаклий омилга эга бўлади: иккитаси 4,7 дюйм ва 5,5 дюйм экранли классик модель, учинчисининг эса диагонали 5 дюйм бўлади. Барча моделлар алюминий рамка билан ўралган шишали орқа қопқоққа эга бўлади — бу борада у iPhone 4’ни ёдга солиши мумкин.

Нашр аввал хабар берганидек, iPhone 8’нинг 5,5 дюймли версиясида эгилувчан OLED дисплейи ўрнатилади. Бундан ташқари, Yuanta Investment Consulting таҳлилчиси октябрда янги авлод iPhone'нинг асосий янгилиги симсиз зарядка бўлишини қайд этган эди.

ОАВда тарқалган хабарларга кўра, Apple анъанавий оралиқ ишлаб чиқаришни тўхтатиб, iPhone 7s ўрнига бирданига iPhone 8 тақдим қилади. Авваллари блогер Жон Грубер янги iPhone корпуслари бутунлай шишадан тайёрланишини, шунингдек, экран рамкаси олиб ташланишини маълум қилган эди.