Филиппиндаги Дату Мауди-Ампатуан шаҳри мэри Самсудин Димауком ҳамда унинг 9 нафар ёрдамчиси гиёҳвандликка қарши полиция рейди билан отишмада ҳалок бўлди. Мазкур рейд мамлакат президени Родриго Дутерте буйруғига биноан амалга оширилмоқда. Бу ҳақида 28 октябрь, жума куни Gulf News нашри хабар берди. 

Полиция бошлиғи Ромео Галгонинг сўзларига кўра, воқеа 28 октябрь куни эрталаб Шимолий Котабато провинциясидаги  Макилала шаҳридаги назорат-текширув пункти (НТП) ёнида содир бўлган. Ҳуқуқни муҳофаза қилиш органлари Димауком ва унинг ёрдамчилари Даваодан (Магинданао провинцияси) йирик партиядаги метамфетамин ўтказишни режалаштираётгани ҳақида маълумот олишган. 

Полиция маълумотига кўра, гумондорлар уч автомобилда НТП ёнига келиб, ҳуқуқ-тартибот ходимларига қарата ўқ очишган ва полиция ходимлари билан отишмаларда ҳалок бўлишган. 

Бундан аввал Дутерте 150 нафар амалдорни ноқонуний наркотрафикда расман айблаган эди, Димаукомнинг номи ҳам ушбу рўйхатдан жой олганди. Президент номлари тилга олинган сиёсатчиларга дарҳол ҳукуматга таслим бўлишни буюрган. 

Димауком ўз хоҳишига кўра, полицияга таслим бўлган, бироқ наркотрафикда қатнашганини инкор этганди. ОАВга эса ўзи ҳам айнан шу муаммо билан курашаётгани ҳамда Дутерте йўлга қўйган сиёсатни қўллаб-қувватлашини маълум қилганди.