Яман президенти Абду Раббу Мансур Ҳадий БМТ томонидан таклиф қилинган мамлакатдаги можароларни тинч йўл билан ҳал қилиш режасини рад этди. Бу ҳақида президент маъмуриятидаги манбасига таяниб, "Франс Пресс" хабар берди

Манбага кўра, Ҳадий Улд Шайх Аҳмадни (БМТнинг Ямандаги махсус элчиси) қабул қилган ва элчи томонидан етказилган БМТ таклифини рад этган.

Бундан аввал БМТ Ямандаги ҳукумат ва исёнкор хусийлар ўртасидаги зиддиятни ҳукуматнинг янги тузилмасини яратиш йўли орқали ҳал қилишни таклиф қилганди. БМТнинг янги режаси икки томондан ҳам чекинишни талаб қилади: хуситлар пойтахтни тарк этишлари керак бўлади, бунинг эвазига вице-президент Ал-Ахмар ўз лавозимидан воз кечади, Ҳадийнинг ваколатлари эса жиддий чегараланади. 

Ямандаги ҳукумат ва хусийлар ўртасидаги зиддият 2014 йилдан бери  давом этиб келмоқда. Ҳарбий ҳаракатлар натижасида исёнкорлар пойтахт Санони қўлга олишди ва ўзларининг ҳукумат идораларига асос солишди, Ҳадий эса Ар-Риёдга қочишига тўғри келди. 

2016 йилда Ямандаги зиддият иштирокчилари билан бўлиб ўтган тинчлик музокаралари муваффақиятли якун топмади, август ойидан томонлар яна фаол ҳарбий қаршиликка ўтишди. Хусийлар томонида Яманнинг собиқ президенти Али Абдуллоҳ Солиҳнинг содиқ ҳарбийлари жанг олиб боришмоқда. Ҳукуматни эса Саудия Арабистони бошчилигдаги араб ҳарбий коалицияси қўллаб-қувватламоқда.