Microsoft компаниясининг 26 октябрда тақдим қилинган янги ноутбуки Surface Book ахборот оқимида бироз йўқолиб қолди, чунки у эълон қилинган кун эртасига Apple ўзининг янгиланган MacBook Pro ноутбукини тақдим қилди.

Бироқ Microsoft енгилмади ва ўз маҳсулотига эътиборни антиқа усул билан қаратишга қарор қилди. Компания MacBook эгаларига агар улар ноутбукларини Surface Pro ёки Surface Book ноутбукларига алмаштирсалар, 650 доллар беришни таклиф қилди, деб хабар бермоқда Tech Crunch.

Microsoft маълумотларига кўра, Surface Pro 4 ва Surface Book ноутбукларининг 97 фоиз эгаси улардаги сенсор экран имкониятларидан мунтазам фойдаланадилар, Apple эса бу технологиядан четда қолмоқда. Microsoft фикрича, бу имконият Surface ва MacBook’дан бирини танлашда қўл келиши мумкин.

Microsoft’нинг акцияси 10 ноябргача давом этади.