Яхши биласиз, шу йилнинг 15 ноябрь куни Ўзбекистон терма жамоаси Сеул шаҳрида Жанубий Корея футболчиларига қарши ЖЧ-2018 мусобақасининг саралаш баҳсида майдонга тушади.

Бу ўйиннинг қийматини тасаввур қилиш қийин эмас. Ҳар бир йўқотилган очко якунда қимматга тушиши мумкин. 

Ўша баҳсда икки терма жамоа ҳам борини бериб ўйнаши турган гап. Чунки бошқача йўли ҳам йўқ. 

Биз шу кунларда Жанубий Корея матбуотини кузатиб кўрдик. Мамлакатда чоп этиладиган Asian Correspondent, The Korea Herald, The Seoul Times ва Yonhap News нашрлари Ўзбекистонга қарши ўйин борасида кичкина бўлса ҳам чиқишларни қилиб турибди. 

Шу нарса маълум бўлдики, Жанубий Кореянинг 15 ноябрь кундаги Ўзбекистонга қарши ўйини ва келаси йилнинг 23 март кунидаги Хитойга қарши сафар баҳслари учун ҳар бир футболчига мамлакат футбол федерацияси мукофот пулларини ваъда қилган. Яъни, кореяликларга навбатдаги икки ўйинда олти очко йиғиши вазифаси қўйилган.

Ўз навбатида футболчилар ҳам бу ишни бажариш қўлларидан келишини таъкидлашган. Бундан ташқари, Корея термасининг охирги ўйинлари кескин танқид остига олинган ва улар кейинги тайёргарлик жараёнига жиддий эътибор қаратишяпти. 

Нима ҳам дердик, энди ҳар бир ўйин биз учун плей-офф мақомига тенг бўлади. Бизда ҳам савия ва салоҳият етарли. Агар ишга тўғри ёндашсак биз ҳам Кореядан очко тортиб олишга қодирмиз. 

Умид қиламиз, яна икки ҳафтадан кейин бўладиган ўйинда керакли натижани қўлга киритамиз.

Манба: Tribuna.uz