Исландиядаги парламент сайловларида 80 фоиз бюллетень ҳисоблаб чиқилгандан кейин Мустақиллик консерватив партияси етакчилик қилмоқда, деб Исландия марказий сайлов комиссиясига иқтибос келтирган ҳолда хабар бермоқда РИА “Новости” ахборот агентлиги. 

"79,5 фоиз овоз ҳисоблаб чиқилгандан кейин Мустақиллик партияси етакчилик қилмоқда. Унга 30,1 фоиз сайловчи овоз берган", деб маълум қилинди комиссияда.

2-ўринда "Сўл яшиллар" партияси 16,8 фоиз билан бормоқда. Пиратлар партияси 13,8 фоиз билан 3-ўринни эгалламоқда. Пиратлар "сардори" Биргитта Йонсдоттир бу яхши натижа эканини, партиянинг кўпчилик аъзоси парламентга ўта олишини айтган.

Исландия альтингига (парламент) сайловлар муддатдан аввал ўтказилмоқда. Сайловлар 2017 йил май ойида ўтиши керак эди, бироқ Исландияни "Панама ҳужжатлари" чоп этилгандан кейин қамраб олган сиёсий инқироздан чиқиши учун муддатдан аввал ўтказиш белгиланди. Ҳужжатларга кўра, мамлакат бош вазири Сигмюндюр Давид Гюннлейгсонннинг рафиқаси номига Британ Виргиния оролларида офшорлар рўйхатга олингани маълум бўлганди. Шу сабабли бош вазир истеъфога кетишга мажбур бўлган.