Бразилиянинг Парана штатидаги юқори тезликдаги трассада йирик автоҳалокат юз берди. 

BR-323 трассасида автоцистерна ва автобус тўқнашувидан кейин ёнғин чиққан. Ёнғин жуда кучли бўлган ва воқеа жойига етиб келган ўт ўчирувчилар ҳеч нарса қилиша олмаган. Оқибатда автоцистерна ва автобус буткул ёниб кетган. Бу ҳақда Бразилия ОАВлари хабар бермоқда.

Автобусда маҳаллий шифохонадан кўзда операция ўтказгандан кейин қайтаётган беморлар ва уларнинг ҳамроҳлари бўлган. Ёнғин оқибатида 20 киши тириклайин ёниб кетган ёки олинган жароҳатлардан ҳалок бўлган. 9 йўловчини қутқариб қолишга муваффақ бўлинган. Олов қурбонларнинг жасадларини таниб бўлмас даражага келтирган. 

Бир аёл автобусдан сақраб қолишга улгурган, бироқ юрак хуружидан вафот этган. Тирик қолганлар орасида янги туғилган чақалоқ борлиги айтилмоқда. Ҳаммаси бўлиб автобусда 30 га яқин одам бўлган. Йўл-транспорт ҳодисаси сабаблари ўрнатилмоқда.