Ҳиндистон пойтахти Янги Деҳли шаҳрининг ифлосланганлик даражаси меъёрдан 42 мартага ошиб кетди, деб ёзмоқда Hindustan Times нашри. Бунга оловлар фестивали – Дивали сабаб бўлган.

Ўтган дам олиш кунлари мамлакатда Ҳиндистоннинг асосий байрамларидан бири Дивали кенг нишонланган. Унда асосан петарда ва бошқа портловчи мосламаларни портлатиш, фейерверклар учириш амалга оширилади. Шу сабабли, шаҳар эрта тонгдан қуюқ тутун остида уйғонган. 

Янги Деҳли ифлосликларини назорат қилиш комиссияси маълумотларига кўра, PM10 кўрсаткичи (ҳавода диаметри 10 микрометрли зарралар улуши) бир куб метрга 4273 микрограммни ташкил этган. Бу борадаги белгиланган меъёр 100 микрограммдир дейилади хабарда. PM2,5 (диаметри 2,5 микрометрли зарралар улуши) кўрсаткичи меъёр 60 микрограмм бўлгани ҳолда бир куб метрда 748 микрограммни ташкил этган.  

Фото: HT’s Ravi Choudhary

Шу билан бирга қайд этилишича, PM10 ва PM2,5 шаҳарнинг турли туманларида фарқли бўлган. Умуман, нашрнинг ёзишича, Ҳаво сифати индекси (Air Quality Index, AQI) деярли барча кузатув станцияларида энг юқори хавфли кўрсаткич 500 атрофида бўлган. 

Аслида, ҳар куни Ҳиндистон пойтахтида кечки олтидан бошлаб ҳаво ифлосланиши кучайиб, кечки соат 11лар атрофида энг юқори даражасига чиқади ва тонгги 6гача бу ҳолат сақланиб қолади. 

Эксспертларнинг фикрича, ҳавода бу каби зарраларнинг бўлиши астма ва юрак хасталиклари билан касалланган беморлар, шунингдек, болалар ва кексалар учун жуда хавфлидир.
 

Фото: Twitter/@GeetimaK
Фото:Twitter/TK_Scribbler
Фото: Twitter/SharmaKadambini
Фото: Twitter/vibhores
Фото: Twitter/surendranb