Германиянинг Бонн шаҳри суди суриялик қочқинни ўз фарзандларини ўлдиришга урингани учун 15 йиллик қамоқ жазосига ҳукм қилди. Бу ҳақида ВВС нашри хабар берди. 

Ҳасан исмли 35 ёшли суриялик киши жорий йилнинг февраль ойида уч нафар фарзандини уйининг иккинчи қаватдаги деразасидан улоқтирган, бунга унинг турмуш ўртоғи билан бўлиб ўтган жанжали сабаб бўлган. 

1, 5 ва 7 ёшли болалар омон қолишган, бироқ онанинг сўзларига кўра, тўнғич ва ўртанча фарзандларида соғлиқ билан боғлиқ муаммолар мавжуд. Бундан ташқари, уларнинг учаласи ҳам руҳий жароҳат олган. 

Суриялик "ота"нинг ҳуқуқ ҳимоячиси сўзларига кўра, унинг жиноятга қўл уришига "иснод" ҳисси етаклаган: унинг турмуш ўртоғи эрига итоат этмаслигини ва унга Европа аёлларидек муомала қилишни талаб қилган. Буни эшитган суриялик киши ғазаби жўшиб кетган ва фарзандларини деразадан улоқтирган. 

Суд залида ҳукм ўқилганидан кейин айбланувчи "Сурияда бўлганимда мени бир ойда қўйиб юборган бўлишарди", деб  айтган. 

Германия - сўнгги йилларда қабул қилинган қочқинлар сони бўйича етакчилардан бири. 2015 йилда мамлакатга бир миллиондан ортиқ муҳожир ва қочқинлар киритилган.