Британиялик теннисчи Энди Маррей 7 ноябрда ўз фаолиятида биринчи маротаба Профессионал теннисчилар уюшмаси рейтингининг биринчи поғонасини эгаллайди. 

Бу ҳақда канадалик Милош Раонич Париждаги "Мастерс" серияси мусобақаси яримфиналида иштирок этмаслигини айтгандан кейин маълум бўлди. Маррей муддатдан аввал финалга чиқди ва бу унга янги рейтингда биринчи поғонанини эгаллашни таъминлайди. У сербиялик теннисчи Новак Жоковичнинг ўрнини эгаллайди. 

29 ёшли Маррей Профессионал теннисчилар уюшмаси рейтингининг юқори поғонасини эгаллаган биринчи британиялик ҳамда 1973 йилда компьютер рейтинги киритилгандан кейин тарихдаги 23-биринчи рақамли теннисчи бўлади. Маррей Париждаги мусобақа финалига чиқиб, Жоковичдан 5 очкога ўтиб кетди.

Жокович 233 ҳафта (охирги 122 ҳафта узлуксиз) давомида рейтингнинг юқорисида бўлиб келди. Бу америкалик теннисчилар Жимми Коннорс (268 ҳафта), Иван Лендл (270 ҳафта), Пит Сампрас (286 ҳафта) ва швейцариялик Рожер Федерернинг (302 ҳафта) кўрсаткичларидан кейин 5-кўрсаткич бўлди. 

Жорий йилда Маррей Рио-де-Жанейродаги Олимпиада ва Уимблдон мусобақалари ғолиби бўлди.