Britaniyalik tennischi Marrey faoliyatida birinchi marotaba birinchi raqamli tennischiga aylanadi

Britaniyalik tennischi Endi Marrey 7 noyabrda o‘z faoliyatida birinchi marotaba Professional tennischilar uyushmasi reytingining birinchi pog‘onasini egallaydi. 

Bu haqda kanadalik Milosh Raonich Parijdagi "Masters" seriyasi musobaqasi yarimfinalida ishtirok etmasligini aytgandan keyin ma'lum bo‘ldi. Marrey muddatdan avval finalga chiqdi va bu unga yangi reytingda birinchi pog‘onanini egallashni ta'minlaydi. U serbiyalik tennischi Novak Jokovichning o‘rnini egallaydi. 

29 yoshli Marrey Professional tennischilar uyushmasi reytingining yuqori pog‘onasini egallagan birinchi britaniyalik hamda 1973 yilda kompyuter reytingi kiritilgandan keyin tarixdagi 23-birinchi raqamli tennischi bo‘ladi. Marrey Parijdagi musobaqa finaliga chiqib, Jokovichdan 5 ochkoga o‘tib ketdi.

Jokovich 233 hafta (oxirgi 122 hafta uzluksiz) davomida reytingning yuqorisida bo‘lib keldi. Bu amerikalik tennischilar Jimmi Konnors (268 hafta), Ivan Lendl (270 hafta), Pit Sampras (286 hafta) va shveysariyalik Rojyer Federerning (302 hafta) ko‘rsatkichlaridan keyin 5-ko‘rsatkich bo‘ldi. 

Joriy yilda Marrey Rio-de-Janeyrodagi Olimpiada va Uimbldon musobaqalari g‘olibi bo‘ldi.