Канадада Хайд-Гуаи архипелагида маҳаллий аҳоли вакили АҚШнинг Mark 4 атом бомбаси бўлиши мумкин бўлган номаълум жисмни аниқлади. Хавфли буюм 1950 йилда йўқотилган бўлиши мумкин.

Эркак топилма ҳақида дарҳол Канада мудофаа вазирлигига хабар берган. Маҳаллий флот вакиллари бомба ҳақидаги хабарни текшириб кўришга ваъда берганлар. Яқин кунларда воқеа жойига Канада ҳарбий-денгиз кучлари кемаси етиб келади, деб ёзмоқда Guardian.

Мутахассислар бомба хавф солиши мумкинлиги ва уни юзага чиқариш керак-керакмаслигини аниқлашмоқчи.

1950 йил февралда АҚШ ҳарбий-ҳаво кучларининг B-36 бомбардимончи самолёти шу ҳудудда машғулот парвозини амалга ошираётганда унинг двигатели ёниб кетган. Шу сабабли самолёт экипажи бортдаги бомбани Тинч океанига ташлаб, ўзи самолётни тарк этишга мажбур бўлган. АҚШ ҳарбий-ҳаво кучлари маълумотларига кўра, бомба плутоний заряди билан жиҳозланмаган.