АҚШ президенти лавозимига номзод Дональд Трамп ёрдамчилари томонидан твиттердаги аккаунтини бошқаришдан четлатилди. Трамп бу аккаунти орқали бир неча маротаба ўз рақибларига таъналар билдирган. Бу ҳақда The Hill хабар бермоқда.

Жумладан, Трампнинг твиттердаги АҚШ президенти Барак Обама Хиллари Клинтоннинг сайлов кампаниясида иштирок этмаслиги ҳақидаги хабар унинг матбуот котиби Хоуп Хикс томонидан чоп этилган.

Нашр маълумотларига кўра, Трампнинг твиттердаги аккаунтига 13 млн фойдаланувчи обуна бўлган. Трамп бу аккаунтларида ўзининг сиёсий рақибларини ҳақорат қилиш ва баъзи масалаларга "фильтрланмаган фикрларни" билдиришга йўл қўйган. Таъкидланишича, Трампнинг айнан шу "қилмишлари" унинг сайловолди штаби аъзоларига "бош оғриғи" бўлган.

25 октябрда The New York Times нашри Трамп твиттерда ҳақорат қилган одамлар ва жойлар рўйхатини чоп этди. Рўйхат 281 та номдан иборат. Трамп ўзининг аккаунтида нафақат АҚШ Республикачилар ва Демократлар партиялари вакилларини, балки ОАВ, ҳаттоки бутун давлатларни ҳам "сийлаб ўтган".

Мисол учун, Трамп Хитойни "даҳшатли давлат", Обамани эса "заиф ва бесамар", The Wall Street Journal нашрини эса "таблоидга (миш-мишлар тарқатувчи) ўхшаш" деб атаган. Бироқ Трамп томонидан ҳақоратга учраган одамлар орасида Клинтон алоҳида ўрин тутади: миллиардер ўзининг асосий рақибига 300 дан кўпроқ зардали хабарларини "бағишлаган".