Трампнинг ғалабаси «Формула-1» пойгачиси Пересга қимматга тушди

Спорт 11 Ноябрь 2016 7756
Фото: tass.ru

«Формула-1» таснифида «Форс Индия» жамоаси таркибида жаҳон чемпионатларида иштирок этган мексикалик пойгачи Серхио Перес Hawkers компанияси билан шартномани бекор қилиш ниятида. Бунга, мазкур компания ижтимоий тармоқларда Перес мамлакати ҳақида ҳазиллашгани сабаб бўлди.

Қуёшдан ҳимоя қилувчи кўзойнаклар ишлаб чиқаришга ихтисослашган компания, АҚШ президентлик сайловида Дональд Трампнинг ғалабасидан кейин ўзининг Twitter саҳифасида «энди мексикаликлар кўзёшларини яширишлари учун Hawkers кўзойнакларини тақиб юриши керак бўлади» деб ёзган эди. Бунга жавобан, Перес ҳомийси билан шартномани бекор қилиши ҳақида баёнот берган, деб хабар қилмоқда «BBC».

«Бу нимаси? Бугундан бошлаб Hawkers билан муносабатларни тўхтатаман. Мен ҳеч кимга ҳеч қачон мамлакатимни мазах қилишига йўл қўймайман», — деган пойгачи Twitter саҳифасида. 

Hawkers ўз навбатида барча мексикаликлардан ошкора кечирим сўраб, ўз хабарини ўчириб ташлади. 

Эслатиб ўтамиз, Трамп сайловолди кампанияси чоғида ноқонуний муҳожирликка қарши курашиш мақсадида Мексика билан чегарада девор барпо қилишини таъкидлаган эди. 

 

Кўпроқ янгиликлар