Германиянинг Лейпциг шаҳри аэропортида дунёдаги энг катта самолёт – Ан-225 "Мрия" қўнаётганда двигателларидан бири ёниб кетди. Воқеа гувоҳлари воқеани камерага ёзиб олишди.

Ёнғинни ўчириш учун 9 та ўт ўчириш бригадаси етиб келди ва ёнғин 15 дақиқа ичида бартараф этилди, деб хабар бермоқда Sachsen Fernsehen телеканали. 

Айни вақтда самолёт парвозини давом эттириши ҳақида ҳеч нарса маълум эмас, бу аниқлаштирилмоқда. Аэропорт маълумотларига кўра, самолёт Чилига учиши керак бўлган. 

Самолёт 250 тоннагача юкларни ташиш учун лойиҳалаштириб қурилган. Самолётнинг қанотлари қулочи 88,4 метр, корпуси узунлиги 84 метрни ташкил қилади.