Тошкентда биринчи Халқаро мева-сабзавот ярмаркаси ўз ниҳоясига етди. Ярмарка ишида 33 та хорижий давлат компаниялари, савдо ташкилотлари, қишлоқ хўжалиги йўналиши вазирликлари, логистика компанияларининг 300 дан ортиқ вакиллари иштирок этди. Булар Швейцария, Литва, Германия, Голландия, Франция, Буюк Британия, Польша, Исроил, Италия, Россия, Хитой, Япония, Жанубий Корея, Ҳиндистон, Иордания каби давлатларининг тадбиркорлари.

Ярмаркани ўтказиш дастури асосида иштирокчи хорижий компания ва меҳмонлар билан давра суҳбатлари ва музокаралар ўтказилди.

Ярмарка якуни бўйича хорижий харидорлар билан ўтказилган музокаралар натижасида қиймати 1009 млн.долларлик 1421 минг тонна маҳсулотларни экспортга чиқариш бўйича 355 та шартнома имзоланди, шундан 120 минг тонна маҳсулот 2016 йил якунига қадар экспортга йўналтирилиши кўзда тутилди. Барча шартномалар Халқаро мева-сабзавот ярмаркаси дирекцияси томонидан белгиланган тартибда рўйхатга олинди.

Ярмарканинг ўтказилиши мева-сабзавот маҳсулотларини экспорт қилиш географиясини янада кенгайтириш имконини берди. Хусусан, Европа мамлакатлари Германия, Шотландия, Швейцария, Буюк Британия, Украина, Белорусия, Литва, Озарбайжон, Россия, Жанубий-Шарқий Осиёдан Хитой, Корея, Япония, Яқин Шарқ мамлакатлари Ироқ, БАА, Туркия давлатларига маҳсулот экспорт қилиш бўйича тўғридан-тўғри шартномалар тузилди.

Натижада тузилган шартномаларда мевалар 25 фоизни, узум 17 фоиз, сабзавотлар 32 фоиз, қуритилган ва қайта ишланган маҳсулотлар 13 фоиз, дуккаклилар 13 фоиз ва полиз маҳсулотлари 1 фоизни ташкил этди.

Ярмарканинг сўнгги иш куни давомида “Ўзбекозиқовқатхолдинг” компанияси ва “Ўзагроэкспорт” акциядорлик жамияти вакилларининг республика мева-сабзавот маҳсулотларини етиштириш, уларни қайта ишлаш ва экспортга йўналтириш бўйича мавжуд имкониятлар, улардан фойдаланиш салоҳиятлари тўғрисида тақдимотлари тингланди.
3 кун давомида ярмаркани томоша қилишга келганлар сони эса, 7000 кишидан ошиб кетди.

Хорижнинг кўплаб нуфузли қайта ишловчи ва савдо компаниялари Ўзбекистонда етиштирилаётган мева-сабзавотлар, полиз экинлари, узум ва дуккакли ўсимликларнинг сифати, қайта ишланган мева-сабзавот маҳсулотларининг таркибий ҳусусиятлари, экологик софлик даражаси ҳақида етарлича маълумотга эга бўлиб кетишди.