Арманистон президенти Серж Саргсяннинг изоҳ беришича, Россиянинг «Искандер» ракета мажмуаларини республика ҳудудида жойлаштириш мажбурий чорадир. У минтақадаги барқарорликни сақлашга хизмат қилади, деб хабар қилмоқда РИА «Новости» агентлиги.

«Ўйлашимча, бу минтақамиздаги ҳарбий мувозанатни тиклаш учун мажбурий чора. Сир эмаски, Озарбойжон сўнгги бир неча йилда доимий равишда янги қурол-аслаҳа сотиб олди. Биз Озарбойжон каби молиявий имкониятларга эга эмасмиз. Бироқ, вазиятни бир маромда ушлашга ҳаракат қиламиз», — деган Саргсян.

Шу билан бирга, у қурол-яроғлар пойгасини «номақбул вазият» сифатида баҳолаган.

Ушбу мажмуалар илк бора 21 сентябрда Ереванда Арманистон мустақиллигининг 25-йиллиги муносабати билан ўтказилган ҳарбий парад чоғида намойиш этилган эди.