08:05 / 19.11.2016
7152

APL. London derbisi, Mourino - Venger to‘qnashuvi va 12-turning boshqa uchrashuvlari

Bugun qisqa tanaffusdan so‘ng Angliya premer-ligasining navbatdagi tur uchrashuvlariga start beriladi. chempionatning muntazam qarama-qarshiligiga aylangan Mourino - Venger to‘qnashuvi. London derbisi, peshqadamlarning mehmondagi o‘yinlari. Bir so‘z bilan aytganda dunyoning eng tomoshabop chempionati o‘ta qiziq bo‘lgan uchrashuvlarni bizga va'da qilmoqda. Tribuna.Uz sizlarga Angliyadagi uik-endning barcha uchrashuvlari anonsini taqdim qiladi.

19 noyabr. 17:30 Manchester Yunayted (6-o‘rin) - Arsenal (4-o‘rin)

Kecha haftaning markaziy uchrashuvlari haqidagi maqolada uchrashuvga batafsil to‘xtalib o‘tdik. 16 uchrashuvdan buyon mag‘lubiyat nimaligini bilmay kelayotgan Arsen Venger nobarqaror Mourinoni faoliyatida birinchi marta mag‘lub eta oladimi? Xullas bitta o‘yinning o‘zida g‘ich-g‘ich intriga.

20:00. Kristal Pelas(16) - Manchester Siti (3)

So‘nggi beshta uchrashuvda faqatgina bir marta g‘alaba qozongan «Manchester Siti» o‘ziga kelib olish uchun qisqa bo‘lsada tanaffusga ega bo‘ldi. Terma jamoalar ishtirokidagi o‘yinlar payti Gvardiola yuzaga kelgan vaziyat bo‘yicha kerakli xulosalarni chiqarib olganmi yoki yo‘q buni bugun bilib olamiz.

Umuman «Manchester Siti»ning o‘yinida pasayish bo‘ldi deb aytib bo‘lmaydi. Jamoa mavsum boshida bo‘lgani kabi haliyam juda ko‘plab vaziyatlar yaratmoqda. Bitta o‘yinning o‘zida bir nechta taktikalar orqali raqiblariga tinchlik berayotgani yo‘q. Faqat so‘nggi uchrashuvlarda vaziyatlardan foydalanish bo‘yicha oqsash kuzatilmoqda. Aynan mana shu jihat jamoaning kamida 4 ochko yo‘qotishiga sabab bo‘ldi. «Kristal Pelas»da esa ishlar pachava. Alan Pardyu jamoasi so‘nggi beshta uchrashuvning to‘rttasida imkoniyatni boy berdi va bir marta durang natija qayd etdi. 11 uchrashuvda 11 ochko to‘plagan jamoani xavfli zonadan faqatgina bir ochko ajratib turibdi. Favoritga qarshi o‘yinda jamoaning imkoniyatlari past baholanayotgan bo‘lsada, Pardyu shogirdlari o‘zlariga kelib olishlari uchun qanday qilib bo‘lsa ham, bu uchrashuvda ochko olishlari shart.

20:00. Everton (7) - Suonsi (19)

O‘tgan turda «Chelsi»dan qaqshatqich zarba qabul qilib olgan Ronald Kuman shogirdlari bu turda mavsumni juda bo‘sh o‘tkazayotgan «Suonsi»ga qarshi o‘tkazadi. «Suonsi» mavsum boshidayoq murabbiyni almashtirishga majbur bo‘ldi. Biroq aqshlik Bob Breydli ham hozircha jamoa o‘yinida sezilarli o‘zgarishlarni amalga oshira olmayapti. «Chelsi» bilan o‘ynda alamzada bo‘lib qolgan «Everton»ga qarshi o‘yin uelsliklar uchun yanada murakkab kechishi aniq. Jamoa to‘purari Romelu Lukakuning yuqori sport formasiga chiqqanini hisobga olib aytsak, Liverpulda yirik hisobdagi natijani kutishga haqlimiz. Yana kim biladi deysiz, axir bu yer Angliya!

20:00. Sauthempton (10) - Liverpul (1)

Ko‘pchilik muxlislar tomonidan «Liverpul»ning fram-klubi deb hazil ostiga olinadigan «Sauthempton»ni bu turda juda katta sinov kutib turibdi. Yetakchilarga qarshi qanday o‘ynashni yaxshi biladigan Klod Pyuel shogirdlari, fantastik oraliqni o‘tkazayotgan Yurgen Klopp jamoasiga qarshi maydonga chiqadi.

Hozircha Pyuel jamoasining ishlarini ham silliq kechmoqda deb bo‘lmaydi. Jamoa 10-o‘rinda borayotgan bo‘lsa ham xavfli zona bilan oraliq 3 ochkoni (Bu, APL, bolakay!) tashkil qilmoqda. Shu jihatdan ham bugungi uchrashuv jamoa uchun muhim. «Liverpul» esa «Uotford» bilan uchrashuvdagi gollar yomg‘iridan keyin o‘ta yuqori kayfiyatda bo‘lishi aniq. Ammo jamoa yetakchisi Koutinoning o‘yinda ishtirok etishi so‘roq ostida qolishi jamoa uchun qandaydir xavotirni paydo qilishi mumkin. Ha, darvoqe farm-klub mavzusiga qaytsak, bugun bir yo‘la 4 nafar «Sauthempton» sobiq futbolchilari «Liverpul» libosida maydonga tushishi kutilmoqda.

20:00. Stok Siti(12) - Bornmut(13)

Jo Allenning yuqori sport formasiga kirishi mavsumni juda yomon boshlagan «Stok»ning tez orada o‘ziga kelib olishiga yordam berdi. Mark Xyuz jamoasi so‘nggi olti uchrashuvdan buyon mag‘lubiyat nimaligini bilmay kelmoqda. 3ta g‘alaba va 3ta durang qayd etgan jamoa, natijada so‘nggi o‘rindan 12-o‘ringa qadar ko‘tarilib olishga muvaffaq bo‘ldi. «Bornmut»da vaziyat boshqacharoq. Bir qarasang jamoa raqib darvozasiga oltitalab gol qalashtirib tashlamoqda. Shundan keyin esa shu paytgacha biror marta ham yutmagan jamoaga o‘z uyida imkoniyatni boy berib qo‘yadi. So‘nggi ikki o‘yinni boy bergan jamoa «Stok»ka qarshi o‘yindan oldin 13-o‘rinni egallab turibdi.

20:00. Sanderlend (20) - Xall (18)

Haqiqiy autsayderlar bahsi. «Sanderlend» nihoyat 11-turga kelib mavsumdagi ilk g‘alabasini qo‘lga kiritdi. Devid Moyyes shogirdlari «Bornmut» ustidan mehmonda qozonilgan g‘alabadan endi o‘zlariga kelib olishlari kerak bo‘ladi. Buning uchun ularda juda yaxshi imkoniyat bor. Raqib o‘tgan turda «Sauthempton»dan ustun kelgan bo‘lsada, jamoada jarohat olgan futbolchilarning juda ko‘p ekani, «Hall»ning imkoniyatlarini pasaytirib yuboradi.

20:00 Uotford (8) - Lester (14)

Amaldagi chempion bu mavsumni umuman barqaror o‘tkaza olmayapti. Jamoa hali biror marta ketma-ket bir xil natija qayd qila olgani yo‘q. Mag‘lubiyatda ham, durangda ham g‘alabada ham bu ko‘rsatkich kuzatilmagan. Vardi o‘tgan yilgi o‘yinini topa olmayapti, Mahrez o‘sha biz bilgan Mahrez ekanini isbotlay olgani yo‘q. Bu esa «Uotford»ga qo‘l kelishi mumkin. 15 ochko bilan 8-o‘rinda borayotgan Matstsari shogirdlari g‘alaba qozongan taqdirda yuqori o‘rindagilarga yaqinlashib olish imkoniyatiga ega bo‘ladi.

22:30 Tottenhem(5) - Vest Hem(17)

Bugungi kunning yana bir markaziy uchrashuvlaridan biri bu — London derbisi. Derbi jamoalarning egallab turgan o‘rinlaridan qat'iy nazar doim murosasiz kechgan.

Chempionatda mag‘lubiyat nimaligini bilmagan yagona jamoa bo‘lib turgan Maurisio Pochettino jamoasi bu ko‘rsatkichi bilan ham kuchli to‘rtlikka kira olgani yo‘q. Sababi jamoa juda ko‘p uchrashuvlarda raqiblari bilan ochkolarni bo‘lishib olmoqda. So‘nggi to‘rtta uchrashuvning barchasida durang qayd etilgani ham so‘zimizni isbotlab turibdi. Slaven Bilich boshchiligidagi «Vest Hem» esa mavsumni muvaffaqiyatsiz o‘tkazmoqda. Xavfli zonadan bitta o‘rin yuqorida turgan londonliklar otni qamchilamasa, zich taqvimdagi chempionatning ikkinchi qismida jamoaga juda qiyin bo‘lishi mumkin. Shu sababdan jamoa uchun har bitta uchrashuv juda muhim. Bu esa bizni qiziqarli qarama-qarshilik kutayotganini tasdiqlaydi.

20 noyabr. 21:00. Midlsbro (15) - Chelsi (2)

O‘tgan turda «Manchester Siti» mehmoni bo‘lib so‘nggi daqiqalarda bir ochko ishlab olishga muvaffaq bo‘lgan Aytor Karanka jamoasini bu turda yanada jiddiyroq sinov kutmoqda. So‘nggi besh turdan beri ochko yo‘qotish uyoqda tursin, o‘z darvozasidan birorta ham to‘p olib chiqmagan (to‘plar nisbati 21:0) Antonio Konte shogirdlari g‘alabali yurishini davom ettirishga harakat qiladi. O‘z navbatida «Manchester Siti» bilan o‘yin tasodif emasligini isbotlashi zarur.

22 noyabrga o‘tar kechasi. 01:00 Vest Bromvich (11) - Byornli (9)

Angliya vaqti bilan dushanba kuniga to‘g‘ri keladigan uchrashuvni haqiqiy o‘rtamiyonalar bahsi deyish mumkin. Turnir jadvalida yonma-yon joylashgan ikki jamoalardan qaysi biri yuqoriroq o‘ringa ko‘tarilish imkoniyatiga ega bo‘lishini shu o‘yin ko‘rsatib beradi. «Byornli» Tom Hitonning darvozadagi qahramonliklari evaziga so‘nggi uch turdan buyon mag‘lubiyat nimaligini bilmay kelmoqda. «Vest Bromvich» uzoq davom etgan g‘alabasiz o‘yinlardan keyin o‘tgan turda amaldagi chempion «Lester»ni mag‘lubiyatga uchratdi. Ikki yaxshi kayfiyatdagi jamoalar to‘qnashuvi e'tiborga molik bo‘lishi tabiiy.

Bir so‘z bilan aytganda, Angliyada bu haftada bir-biridan qiziq bo‘lgan qarama-qarshiliklar bizni oldinda kutmoqda. Har yilgidan ham ko‘ra qiziqarli o‘tayotgan chempionat o‘yinlarini kuzatishda davom eting.

.Manba: tribuna.uz

 

Top