Ўзбекистон Вазирлар Маҳкамаси қабул қилган янги қарорга кўра, Самарқанд вилоятининг Ургут туманида, Бухоро вилоятининг Ғиждувон туманида, Фарғона вилоятининг Қўқон шаҳрида ва Хоразм вилоятининг Ҳазорасп туманида янги эркин иқтисодий зоналар ташкил қилинади.  Давлат раҳбарининг бу ҳақдаги фармони лойиҳаси муҳокама учун Ягона интерактив давлат хизматлари порталига жойлаштирилган.

Янги эркин иқтисодий зоналар ташкил қилишдан асосий мақсад — вилоятларда минерал-хом ашё ресурслари ва қишлоқ хўжалик маҳсулотларини чуқур қайта ишлаш бўйича замонавий корхоналар яратиш учун хорижий ва маҳаллий инвестицияларни жалб этишга қулай шароитларни юзага келтиришга, шунингдек, ишлаб чиқариш ва ресурс салоҳиятларидан комплекс тарзда ва самарали фойдаланиш ҳисобланади.

Ушбу сармоялар ёрдамида, янги эркин иқтисодий зоналарда  қишлоқ хўжалиги маҳсулотларини чуқур қайта ишлашга, сақлаш ва қадоқлашга ихтисослашган цехлар, тўқимачилик, гиламдўзлик, пойабзал ишлаб чиқарувчи фабрикалар, фармацевтика, озиқ-овқат, қурилиш материаллари ва автомобил саноати корхоналари ташкил этиш кўзда тутилган.

Ушбу зоналарнинг фаолият кўрсатиш муддати 30 йилни ташкил этади ва кейинчалик узайтирилиши мумкин, бу вақт давомида бу ерда алоҳида солиқ ва божхона имтиёзлари амал қилади.

ЭИЗларда фаолият юритаётган корхоналар ер солиғи, мол-мулк солиғи ва бошқа давлат солиқларидан озод этилади. ЭИЗлар ҳудудида алоҳида божхона постлари ва логистика марказлари ҳам ташкил қилиниши кўзда тутилган.

Тўрт вилоят ҳокимлиги бир ой муддат ичида янги ЭИЗлар учун керакли ер майдони ажратиши керак. Шунингдек Ташқи иқтисодий алоқалар, инвестициялар ва савдо, Молия вазирликлари ҳамда Солиқ ва Божхона қўмитаси бир ой муддатда ЭИЗларда амал қиладиган махсус имтиёзли тартибни ишлаб чиқишлари керак бўлади.

Айни пайтда Ўзбекистонда 3та эркин иқтисодий зона — «Навоий», «Жиззах» ва «Ангрен» фаолият кўрсатмоқда.