Туркия ташқи ишлар вазири Мавлуд Човушўғли Туркия ва Россия раҳбарларининг стратегик узоқни кўра билиши туфайли икки мамлакат ўртасидаги келишмовчиликларни қисқа муддатда енгиб ўтганини таъкидлади. Бу ҳақида Daily Sabah нашри хабар берди

Човушўғли РФ ахборот агентлигига мурожаат қилар экан, Туркия ва Россия ҳамкорликда фаолият олиб бориши учун улкан имкониятларга эга бўлганлиги, шунингдек икки мамлакат таҳдидли ва синовли дамларни енгиб ўтганлигини айтиб ўтди. 

"Бизнинг мақсадимиз савдо ҳажмини йилига 100 миллиард долларга кўтариш ва Аккую АЭС каби мегалойиҳа устидаги ишларни якунлаш. Шундай экан, биз "инқироздан олдин" ёки "инқироздан кейин" каби ибораларни қўллашни тўхтатишимиз ва мақсад сари ҳаракат қилишимиз лозим", - деди ташқи ишлаар вазири. 

Човушўғли икки мамлакат ҳам муносабатларни яхшилаш борасида ташаббус кўрсатиш кераклигини таъкидлади. Шу билан бирга у Россия Туркиянинг қишлоқ хўжалик маҳсулотларига нисбатан қўйилган санкциялар ҳамда турк компаниялари фаолиятидаги чекловларни бекор қилиши кераклигини қўшимча қилди. 

У Туркия ва Россия ўртасидаги иқтисодий алоқалар бир-бирини тўлдириб туришини таъкидлади. 

"Россия Туркияга энергия етказиб берувчи асосий мамлакатдир. Туркия эса Россияга энг яхши мева ва сабзавотларни етказиб беради", - деди у.