Қозоғистон президенти Нурсултон Назарбоев Қозоғистоннинг мустақиллик йилларида эришган учта асосий ютуғини санаб ўтди. У бу ҳақда 28 ноябрда "Россия 24" телеканалига берган интервьюсида айтиб ўтди, деб хабар бермоқда Tengrinews.kz портали.
 
"25 йил ичидаги ютуқларимиз орасида 1-рақамлиси – Қозоғистон давлатини нолдан қурганимиздир. Иккинчи ютуғимиз – пойтахтимиз қурилиши. Учинчи ютуғимиз – бизнинг ташқи сиёсатдир, бунда биз барча қўшниларимиз билан дўстона муносабатлар қурмоқдамиз", деб айтди Назарбоев. 

Назарбоев мамлакат пойтахти Астанани бренд деб ҳисоблашини айтди. "Бу ерда барча муҳим воқеалар ўтади. Ҳар гал келганингизда бу ерда нимадир ўзгарганини кўрасиз. Албатта, бу амалга оширилган орзудир", деб таъкидлаб ўтди Назарбоев. 

24 ноябрда Назарбоев Астананинг унинг номи билан қайта номланиши таклифига изоҳ берганди. "Мен бу учун барчага ҳамда парламентга бизнинг тараққиётимиз босқичлари қайд қилиб ўтилган декларация учун миннатдорчилик билдирмоқчиман. Менинг ролимни қайд қилиб ўтишди. Албатта, инсон сифатида бу менга ёқимлидир", деб айтганди Қозоғистон президенти.

23 ноябрда Қозоғистон парламенти депутати Куаниш Султанов Астанани Назарбоев номи билан қайта номлашни таклиф қилганди. "Мамлакат конституциясида бизнинг биринчи президентимиз – миллат етакчисининг давлатимиз қурилишидаги улкан ҳиссасини қайд қилиб, Элбошининг номини пойтахт номида ва мамлакатнинг бошқа муҳим объектлари номида акс эттиришни таклиф қиламиз", деб айтилган депутат ўқиб эшиттирган декларацияда. Депутатнинг бу таклифини бошқа депутатлар ҳам жўшқин қўллаб-қувватлаганлар.