Ўзбекистон мудофаа вазири, генерал-полковник Қобул Бердиев ва Россия Федерацияси мудофаа вазири, армия генерали Сергей Шойгу ҳарбий-техник ҳамкорликни ривожлантириш шартномасини имзоладилар. Бундан ташқари, икки ҳарбий идоралар ўртасида 2017 йилга мўлжалланган режа ҳам вазирлар томонидан тасдиқланган, деб хабар қилмоқда Россия Федерацияси мудофаа вазирлиги. 

"Бугун ушбу ҳужжатнинг имзоланиши сизнинг мамлакатингиз Қуролли кучларини жиҳозлаш масалаларини зудлик билан ҳал этиш ва уларнинг жанговар салоҳиятини ошириш имконини беради. Шу билан бирга, мудофаа идораларимизнинг ҳамкорлигини фаоллаштириш ҳамда унга амалий тус беришга ҳаракат қилмоқдамиз", - деган Россия мудофаа вазири. 

Унинг сўзларига кўра, бу биринчи галда, Россия ва Ўзбекистон ҳарбий хавфсизлигини таъминлашга қаратилган қўшма анжуманлар, икки давлат Қуролли кучлари ҳарбий салоҳиятини мустаҳкамлаш, ҳарбий кадрлар тайёрлаш, ҳарбий-техник ҳамкорликка тегишлидир. 

"Марказий Осиё минтақасига нисбатан бугунги кундаги мавжуд таҳдидлар ва чақириқлар, уларга барҳам бериш бўйича саъй-ҳаракатларни бирлаштиришга ундайди. Бизнинг мамлакатларимизга террорчи-жангариларнинг кириб келишига йўл қўймаслик муҳим масаладир", - деб таъкидлаган Сергей Шойгу. 

Бундан ташқари, вазирнинг қўшимча қилишича, Ўзбекистон Қуролли кучларини 2020 йилгача Россиянинг замонавий қурол-аслаҳалари ва ҳарбий техникалари билан қайта жиҳозлаш ва модернизация қилиш дастури ҳам амалга оширилади.