Бутунроссия жамоат фикрини ўрганиш маркази (ВЦИОМ) томонидан ўтказилган сўровномада иштирок этганларнинг 78 фоизи муҳожирларнинг Россияга киритилиши чекланишини ёқлашган. Шу билан бирга, уларнинг 61 фоизи фарзандларининг муҳожирлар фарзандлари билан яқин мулоқотда бўлишига қарши эмас. 

Тадқиқотда маълум бўлишича, россияликлар орасида, иш берувчиларга маҳаллий аҳолидан кўра муҳожирларни ёллаши фойдалироқ, деган фикр ҳамон сақланиб қолган. Сўралганларнинг 81 фоизи шундай фикрда эканини билдирган. 

Ижтимоий сўровда қатнашганларнинг 71 фоизига кўра, муҳожирлар кам маошга ҳам рози бўлишади, шу билан иш ҳақлари оширилишига тўсиқ бўлишади. 

Шунга қарамай, ВЦИОМ хулоса қилишича, россияликларнинг аксарияти (67 фоиз), муҳожирлар маҳаллий аҳоли ишламайдиган соҳаларда фаолият юритишини яхши англашади.