АҚШ конгресси кейинги молиявий йилда Украинага ҳарбий кўмак кўрсатиш учун 350 млн доллар ажратади. Бу қиймат АҚШ мудофаа бюджети лойиҳасига киритилган.

Бу ҳақда ТАСС ахборот агентлигига 29 ноябрда сенатнинг қуролли кучлар ишлари бўйича қўмитаси вакили маълум қилди.

Вакилнинг айтишича, бу пулларнинг ишлатилиши бўйича қарорни АҚШ президенти қабул қилади, бунинг учун ҳеч қандай қўшимча шартлар кўзда тутилмаган. 

Бундан ташқари, қўмитада маълум қилинишича, бюджет лойиҳасига НАТОни Европада мустаҳкамлаш учун 3,4 млрд доллар ажратилиши моддаси киритилган. Айни вақтда Конгресснинг икки палатаси қўмиталари 2017 молиявий йил учун мудофаа бюджети бўйича келишиб олдилар, у бўйича овоз бериш жорий ҳафта охирида ўтказилиши белгиланган. Мудофаа бюджетининг умумий ҳажми 618,7 млрд долларни ташкил қилади.