Буюк Британияда 5 фунт стерлинг қийматидаги янги купюра сабабли катта можаро чиқди. Аниқланишича, бу пулларни яратиш учун ҳайвонлар ёғидан фойдаланилади ва энди вегетарианлар Англия банкидан ушбу купюрани чиқаришда бу моддадан фойдаланишни бас қилишни талаб қилишмоқда. 

Ҳайвонлар ҳимоячилари талаб оҳангида ҳукуматдан янги пулни чиқаришда "инсонийлик кўрсатиш" сўралган петицияни чоп этишди. Таъкидланишича, айни вақтда ушбу ҳужжатга 94 минг киши имзо қўйган.

Янги 5 фунт стерлинглик купюра жорий йилнинг сентябрида муомалага чиқарилганди. Анъанавий қоғоз пулдан фарқли равишда, пластик тарзида яратилган бу пул бирлигининг бир томонида қиролича Елизавета II, орқа томонида эса Буюк Британиянинг собиқ бош вазири, марҳум Уинстон Черчилль сурати туширилган.

Ноябрь охирида твиттер фойдаланувчиларидан бири ушбу пластик купюраларни босувчи Англия банкидан уларни чиқаришда ҳақиқатан ҳам ҳайвонлар ёғи ишлатилиши ҳақида сўраган ва буни тасдиқловчи жавоб олган. Амалдорлар эса худди шундай модда совун ва шамлар ишлаб чиқарилишида ишлатилишини айтишмоқда.