Нафақат Tesla Motors машиналар учун автопилотлар яратади. Европада оммабоп ва урфга кирган бу йўналишни барча йирик автомобилсозлик компаниялари эгаллашни истайди. Мана энди АҚШнинг Ford компанияси Европа ҳудудида автопилотли машиналарни синовдан ўтказишни бошлашини эълон қилди.  

Ford’нинг бундай машиналарининг биринчи синовлари Англиянинг Эссекс муҳандислик марказида бошланади, сўнгра синовлар Германиянинг Ахен ва Кёльн шаҳарларида давом эттирилади. Автоконцерн мутахассислари жойларда тадқиқот ўтказишга тайёрланмоқдалар. Компания вакили Ford нима учун Европани танлаганига изоҳ бериб, Европа Иттифоқидаги қонунлар ҳайдовчисиз автомобиллар борасида кўпроқ эркинлик беришини, бироқ шу билан бирга бу қонунлар ЕИнинг ҳар бир давлатида турличалиги, бу эса машиналарни турли шароитларда синовлардан ўтказишга имкон беришини айтди.

Ford ўз синовларида датчиклар ва камералар ўрнатилган Ford Fusion гибрид моделидан фойдаланади. Бу машиналарнинг оддийларидан фарқи шундаки, уларнинг томида лидарлар ўрнатилган. Компаниянинг яқин беш йиллик учун режаларида 4-даражадаги автопилотли машиналарни серияли тарзда ишлаб чиқариш режаси бор. Бунда 0-даража машинанинг умуман автоматлаштирилмаганини, 5-даража эса унинг тўлиқ автоматлаштирилганини билдиради.