Колумбиянинг Медельин шаҳри яқинида ҳалокатга учраган самолёт венесуэлалик тадбиркор ва собиқ сиёсатчи Рикардо Альбасетега тегишли бўлган, деб хабар қилмоқда Рейтер агентлиги.

6 йил муқаддам, 2010 йилда Альбасете Венесуэлада Linea Aerea Meridena Internacional de Aviacion (LAMIA) компаниясига асос солган. Агентлик маълумотларига кўра, Венесуэла фуқаро авиацияси бошқармаси авиаташувчига ошкор қилинмаган сабабларга кўра, парвозларни амалга ошириш учун лицензия бермаган. Кейинроқ, тадбиркор учта самолётини ўз компаниясидан мустақил хўжалик юритувчи LAMIA Bolivia компаниясига ижарага берган. Колумбияда қулаган самолёт айни шулардан бири бўлган. 

Боливия фуқаро авиацияси бошқармаси раҳбари Цезар Вареланинг сўзларига кўра, ҳалокатга учраган ҳаво кемаси 2016 йил январида сертификатлашдан ўтган. 

Маълумотларга кўра, Альбасете бундан аввал китоб дўконлари тармоғи, энергетика компанияси ва таълим хизматлари таклиф қилувчи ташкилотни бошқарган. У 1990 йилларда Венесуэланинг сўл кайфиятдаги "Радикал иш" партиясида ҳам фаолият юритган.