25-26 ноябрь кунлари Мехикода (Мексика) спорт гимнастикаси бўйича Abierto Mexicano de Gimnasia халқаро турнири бўлиб ўтди. Мусобақаларда дунёнинг 10 мамлакати спортчилари иштирок этишди - Бразилия, Германия, Испания, Италия, Колумбия, Мексика, Руминия, Ўзбекистон, Украина ва Япония. Бу ҳақида Миллий олимпия қўмитасининг матбуот хизмати хабар берди. 

Ўзбекистон шарафини ҳимоя қилган Оксана Чусовитина таянч сакраш мусобақаларида энг яхши натижани кўрсатиб, 14,25 баллни қўлга киритди. Иккинчи ўринни эса 13,975 балл билан украиналик гимнастикачи Ангелина Кисла эгаллади. Учинчи ўрин 13,92 балл билан мексикалик Мириана Алмеидага насиб этди. 

4 хил машқни ўз ичига олган кўпкураш мусобақасида Чусовитина 52,225 балл билан турнирнинг бронза медалини қўлга киритди. Кумуш медаль - бразилиялик гимнастикачи Каролин Педро (53,975), олтин эса украиналик Ангелина Кислага (54,400) тақдим этилди. 

Оксана Чусовитина — гимнастика тарихида - ёзги Олимпиада ўйинларида 7 марта иштирок этган ягона гимнастикачи ҳисобланади. У уч карра жаҳон чемпиони, дунё биринчилигининг тўрт кумуш ва тўрт бронза медаллари соҳибидир.