Калифорниянинг Princess Cruise круиз компанияси уммонни чиқиндилар билан ифлослантириш ва буни яширишга уринишдаги ўз айбини тан олди. Компания 40 миллион доллар жарима тўлаши талаб этилади, деб ёзади Washington Post газетаси.

Princess Cruise — Carnival корпорациясининг бўлинмаси ҳисобланади. Жиноий иш эса компаниянинг 3,2 минг йўловчига мўлжалланган Caribbean Princess кемаси билан боғлиқ. Кема ускунага қўйилган одатий талабларни чеклаб ўтиш бўйича алоҳида найрангларни ишлатиб, таркибида нефть бўлган минглаб галлон чиқиндини ноқонуний равишда уммонга оқизиб юборган.

Терговнинг аниқлашича, ноқонуний ҳаракат 2005 йилдан бери амалга оширилган. Маълум қилинишича, компаниянинг бошқа тўртта кемасида ҳам бир қатор қонунбузарликлар содир этилган.

Компания раҳбарияти афсусда экани ва компания сиёсатини бузган кема ходимларининг ҳаракатини оқламаслигини маълум қилди. Шунингдек, компанияда 2013 йилнинг августида – муаммо ҳақида хабар топишгач, ички текширув бошлангани ҳам айтилган.

Айбни тан олиш бўйича келишув шартларига кўра, Carnival корпорацияси кемалари миллионлаб жарима пулини тўлашдан ташқари, беш йил давомида кемани кузатиб бориш бўйича ишлаб, доимий равишда ташқи текширувлардан ўтказилади.