Колумбия фуқаро авиацияси хавфсизлик хизмати раҳбари Фредди Бонильянинг маълум қилишича, Боливиянинг Lamia авиакомпаниясига тегишли ҳалокатга учраган самолёт бошқа шаҳардан парвоз қилиши керак бўлган. 

Аввалроқ, Колумбия ҳукумати самолётнинг қулашига унинг ёқилғиси тугаб қолгани сабаб бўлганини айтган эди. 

"Компаниянинг Колумбиядаги вакили парвоз учун рухсат сўраганида, ҳаво лайнери Кобиха шаҳридан учишини қайд этган", — дея Бонильянинг сўзларидан иқтибос келтиради Deber портали. 

Шунга қарамай, самолёт Кобихадан бирмунча узоқроқда жойлашган Санта-Крус шаҳридан ҳавога кўтарилган. 

Бонильянинг сўзларига кўра, аслида ушбу парвоз белгиланган тартибда мувофиқлаштирилмаган.