Кўзойнакларга ўрнатилган фотокамералар бугунги кунда янгилик эмас. Шунга ўхшаш кўзойнакларни ишлаб чиқариш ва сотишга уринишлар аввал ҳам бўлган, бироқ бундай кўзойнаклар Snapchat‘нинг камерали кўзойнаклари Spectacles пайдо бўлгандан кейин ҳаиқатда оммалашиб кетди. Бу кўзойнак оммалашиб, яхши сотила бошлагандан кейин кўпчилик компаниялар ҳозирча рақобатчилар кўп бўлмаган бу соҳага кириш учун бундай кўзойнакларни яратиш ҳақида ўйланиб қолдилар.

Шундай компаниялардан бири PogoTec бўлиб, унинг ишланмаси бошқачароқ, яъни модулли йўл билан кетмоқда. Бу компания камерали кўзойнаклар эмас, балки уларга камералар яратади. Бунинг учун кўзойнакнинг металл гардишини олиб, уни магнитлаб, унга камерани ёпиштириб қўйиш кифоя қилади ва қарабсизки, ўзингизнинг севимли кўзойнакларингиздан айрилмаган ҳолда суратга ёки видеотасвирга олишингиз мумкин бўлади. Бунда асосийси бу камераларни 129 долларга сотиб олишни унутмаслик керак.

"Кўзойнаклар энг қадимий тақиб юрилувчи гаджетлардан бири, улар 700 йилдан бери мавжуд, шунинг учун биз уларни турли аудиовизуал қурилмалар учун ўзига хос платформага айлантиришга қарор қилдик", деб айтмоқда компания вакили.

Компания режаларида нафақат фото ва видеотасвир учун камералар яратиш бор. Маълум қилинишича, келажакда кўзойнак гардишига ўрнатиш мумкин бўлган бошқа қурилмалар ҳам пайдо бўлади. Компания вакиллари булар ҳақда январда ўтадиган Consumer Electronics Show кўргазмасида батафсил маълумот беришмоқчи.

Кўринишича, компания ишлари ёмон кетмаётганга ўхшайди, бироқ қурилманинг ўзига бир нечта савол туғилмоқда, чунки камера 5 Мпли, унинг хотираси эса бор-йўғи бир неча юз суратга ёки 720 р сифатдаги 12 та 10 сониялик роликларга етади. Унда шунингдек маълумотларни симсиз узатиш имконияти йўқ. Камерага олинган сурат ёки роликларни компьютер ёки смартфонга ташлаш учун махсус переходник керак бўлади. Бироқ, январгача ҳали вақт бор ва қурилмадаги бу камчиликлар бартараф этилиши ҳам мумкин.