Туркия парламенти пайшанба куни Адананинг жанубий провинциясида 11 қизнинг ҳаётига зомин бўлган ётоқхонадаги ёнғин юзасидан тергов комиссиясини тузиш ҳақида қарор чиқарди. Бу ҳақида Daily Sabah нашри хабар берди. 

Ёнғинга нисбатан лоқайдлик бўлган ёки бўлмаганлиги AK Party, CHP, HDP ва MHP депутатлари ҳамкорлигида тузилган тергов комиссияси томонидан ўрганиб чиқилади.  

Бундан аввал 29 ноябрь куни Туркиянинг Адана провинциясидаги болалар интернатида чиққан ёнғинда 12 киши, жумладан, 11 қизча ҳалок бўлгани ҳақида хабар берилган эди. 

Дастлабки маълумотларга кўра, ёнғинга электр узатгичдаги қисқа туташув сабаб бўлганлиги таъкидланганди. 

Бу ҳалокатли ҳодиса фавқулодда ҳолатларда хавфсизлик қоидаларига бепарволик билан муносабатда бўлганликнинг яна бир далилидир. Ҳукумат вакиллари воқеа юзасидан ҳар томонлама тергов ишлари олиб боришга ваъда беришган. 

Экспертлар томонидан тайёрланган дастлабки ҳисоботга кўра, бинодаги электр энергиясини етказиб берувчи тизимлар эски бўлган ва бу ёнғин келиб чиқишига сабаб бўлган. Шунингдек мутахассисларнинг сўзларига кўра, бинонинг ёғоч интерьери ёнғинни назоратдан чиқариб юборган. Фавқулодда вазиятларга мўлжалланган эшиклар оловга чидамли бўлмаган ПВХдан ясалганлиги маълум қилинган.

Бундан ташқари, улар электр тизими ишдан чиққан тақдирда, уни умумий тизимдан ўчириб қўйиш имкони бўлмаганига диққатни қаратишди.