Андижонда байрам кунлари арафасида миришкор деҳқон фермерлар томонидан ўзлари етиштирган маҳсулотларни шаҳар аҳолисига тортиқ этилиши анъанага айланган. Куни кеча шаҳарликларни сифатли ва арзон қишлоқ ҳўжалиги ҳамда озиқ-овқат маҳсулотлар билан таъминлаш мақсадида “Она ер саховати” ярмаркалари иш бошлади.

Шаҳарнинг 1-кичик даҳасида Олтинкўл туман деҳқонларининг ана шундай павильони ташкил этилиб, харидорларга полиз, сабзовот, балиқ ва гўшт сингари маҳсулотлар арзон нархларда етказиб берилмоқда.

– Савдо шохобчаларида деҳқонларимиз ҳамда озиқ-овқат товарлари ишлаб чиқарувчи корхоналар томонидан тақдим қилинган сара - полиз, мева, сут ва нон маҳсулотлари сотилмоқда, – дейди вилоят ҳокимлиги маъсул вакили Ботиржон Хамраев. - Андижон шаҳрида 15та ана шундай ярмаркалар ташкил этилган бўлиб, маҳсулотларимизнинг бозордагига нисбатан арзон нархларда сотилаётганидан шаҳар аҳолиси беҳад мамнун бўлмоқда.

Ташкил этилган ярмаркаларга вилоят ҳокими Шуҳратбек Абдураҳмонов ташриф буюриб, аҳоли вакиллари билан суҳбатлашди ва улар учун савдо шохобчаларида яратилган шароитлар билан танишди.