Британиялик хакерлар гуруҳи 4,8 миллион роутерни бузиб қўйишган. Гуруҳ аъзосининг сўзларига кўра, бу кутилмаганда содир бўлган, деб хабар қилмоқда  Motherboard сайти. 

Маълумотларга қараганда, хакер ҳамкорлари билан Mirai ботнетининг янги версиясини синаб кўраётган бўлган. Хакерлар ботнет билан зарарланган қурилмалар сонини кўпайтиришни хоҳлаган вақтларида дастур мустақил равишда TalkTalk ва Post Office провайдерларининг роутерларини буза бошлаган.

Motherboard билан суҳбат олиб борган хакер бунинг учун узр сўраган ва провайдерларга мижозлар учун яхшироқ роутерлар топишни маслаҳат берган. 

Mirai — троян дастури бўлиб, турли хил қурилмалардаги камчиликларни топиш учун мўлжалланган. 2016 йил октябрь ойида номаълум хакерлар Dyn DNS-хостерлари серверини ишдан чиқариш учун Mirai дастуридан фойдаланган, шундан сўнг, дастлаб АҚШ шарқида, кейинроқ, бошқа мамлакатларда ҳам ўнлаб таниқли сайтлар ва хизматлар, жумладан Twitter, PlayStation Network, PayPal тизимлари ишдан чиққан эди.

Ноябрь ойида Deutsche Telekom телекоммуникация компанияси 900 мингга яқин маршрутизаторлар зарарли дастур туфайли ишдан чиққанини эълон қилган эди.