Гамбия президенти Яҳё Жамме давлат раҳбари сайловларида мағлуб бўлгани ва истеъфога чиқишга розилиги ҳақида маълум қилди. У мамлакатни 22 йил бошқариб, охир-оқибат қирол бўлиш нияти борлиги ҳақида маълум қилганди, деб хабар беради BBC.

Жамме ўз вазифасини топшириш ва ўтиш даврида янги сайланган президент Адам Бэрроуга ёрдам беришга тайёрлигини билдирди. BBC’нинг таъкидлашича, бу иш амалга ошадиган бўлса, Гамбия тарихида биринчи маротаба ҳукуматни тинч йўл билан бериш ҳолати амалга ошади.

Эслатиб ўтамиз Гамбиядаги президентлик сайловлари 1 декабрь куни ўтказилди. Унда 51 ёшли Бэрооу 45,5 фоиз овоз олган бўлса, Жамме сайловчиларнинг 36,7 фоиз овозини тўплади.

Маълумот учун, Яҳё Жамме Гамбияда 1994 йилда ҳарбий тўнтариш оқибатида ҳукумат тепасига келган. У 1996 йилда мамлакат президенти бўлиб, бир неча бор қайта сайланган. Аввалроқ, Жамме давлатни “миллиард йил” бошқариш истагида эканини маълум қилганди. 2010 йилда эса қирол бўлиш ниятини билдирган.

Янги сайланган президент Адам Бэрроу эса Гамбияда 1965 йилда туғилган бўлиб, 2000 йилларда Лондонга кўчиб ўтиб, у ерда қўриқчи бўлиб ишлаган. Бэрроу 2006 йилда мамлакатга қайтиб келиб, ўзининг риэлторлик агентлигини ташкил қилган.