Qozog‘iston prezidenti Nursulton Nazarboyev Shavkat Mirziyoyevni O‘zbekiston prezidentligiga saylangani bilan tabrikladi. Bu haqda Akorda xabar qilgan.
O‘z tabrigida Nursulton Nazarboyev saylov natijalari O‘zbekiston xalqining yuqori ishonchi va qo‘llab-quvvatlovidan dalolat ekanini qayd etgan.
U Shavkat Mirziyoyevning saylanishi ikki davlat o‘rtasidagi aloqalar mustahkam holda saqlab qolinishini ta'minlashiga ishonch bildirgan.
«Aminmanki, Siz rahbarligingizda qardosh O‘zbekiston barqarorligi va xavfsizligini mustahkamlashga xizmat qiluvchi keng miqyosli islohotlar davom ettiriladi», — qayd etiladi telegrammada.
Nursulton Nazarboyev o‘zaro hamkorlik yangi bosqichga ko‘tarilishiga ishonch bildirgan.
U O‘zbekistonning yangi rahbarini Ostonaga taklif etgan.
«Fursatdan foydalangan holda muloqotlarimizni Ostonada davom ettirish hamda Siz uchun qulay vaqtda Qozog‘istonga davlat tashrifini amalga oshirishingizni taklif qilaman», — deyiladi xabarda.
Qozog‘iston rahbari Shavkat Mirziyeyovga mustahkam sog‘liq va yangi rahbarlik lavozimida muvaffaqiyatlar, o‘zbek xalqiga esa tinchlik va farovonlik tilagan.
