Россия президенти Владимир Путин Шавкат Мирзиёевни Ўзбекистон президенти сайловидаги ишончли ғалаба билан табриклади. Бу ҳақда Кремл матбуот хизмати хабар қилган.

"5 декабрь кунги телефон мулоқоти давомида Россия Федерация президенти Владимир Путин Шавкат Мирзиёевни Ўзбекистонга янги президент бўлгани билан табриклади ва унга давлат раҳбарлиги лавозимида муваффақиятлар тилади", — дейилган хабарда.

Қайд этилишича, таклиф қабул қилинган.

ЎзА Россия Президенти билан телефон орқали мулоқот ҳақида батафсил хабар берган.

Россия Федерацияси Президенти мамлакатимиз раҳбарини Ўзбекистон Республикаси Президенти сайловида муваффақият қозонгани муносабати билан чин қалбдан табриклади. 

Давлат раҳбарлари ҳозирги кунда кўп қиррали Ўзбекистон-Россия муносабатлари юксак даражада эканини мамнуният билан таъкидлаб, Самарқанд шаҳрида ўтган олий мақомдаги икки томонлама учрашув чоғида эришилган келишувлар режали ва тизимли асосда ҳаётга татбиқ этилаётганини ижобий баҳоладилар. 

Томонлар турли вазирлик ва идоралар, хўжалик субъектлари ва бошқа ташкилотлар ўртасидаги самарали ва ўзаро манфаатли ҳамкорлик муайян амалий натижалар бераётганини алоҳида қайд этдилар.

Ўзбекистон ва Россия раҳбарлари стратегик шериклик ва иттифоқчилик муносабатларини, шунингдек, икки томонлама алоқаларга доир барча соҳаларда ҳамда долзарб халқаро ва минтақавий масалалар бўйича ишончли, очиқ ва конструктив давлатлараро мулоқотни изчил давом эттириш ва жадал ривожлантиришга қатъий тайёр эканликларини билдирдилар. 

Суҳбат илиқ ва дўстона руҳда ўтди.