АҚШ президенти этиб сайланган Дональд Трамп унга ҳажвий тақлид қилган таниқли актёр Алек Болдуиндан ранжиди. Актёр NBC телеканалидаги Saturday Night Live ҳажвий кўрсатувида сиёсатчига тақлид қилган. Трампнинг айтишича, тақлид кулгили чиқмаган ва нохолис бўлган.
      
"Saturday Night Live’ни томоша қилишга ҳаракат қилдим – умуман кўриб бўлмайди! Мутлақ нохолис, кулгили эмас ва Болдуиннинг тақлидидан баттари бўмаса керак. Афсус", деб ёзган Трамп твиттерда.

Актёр бунга жавобан, агар Трамп ўзининг даромадлари бўйича солиқ декларациясини чоп этса, буни бас қилишини айтган. Трамп бир неча ўнлаб йиллар давомида ҳали ўзининг даромадларини чоп этмаган биринчи президент бўлди. 

"Солиқ декларациянгизни чоп этинг ва буни бас қиламан. Ха!", деб ёзган актёр ўзининг хайрия жамғармасига тегишли аккаунтдан.